浪跡天涯 漫步袋鼠國 我們的澳洲日誌

2010 年 12 月 31 日 墨爾本   墨爾本火車會在除夕當日免費乘搭 , 只要下午 6 點後到達目的地就可以。 我地因為朝早要去 Warragul ( 墨爾本東面的小鎮 ), 所以去市中心果程就搭左 VLine ( 類似直通車 ) 直去 , 足足坐左兩個鐘。 8 點左右到市中心 , 平日好多車既 Flinder Street 都好似彌敦道咁 , 變成行人專用區 , 我地即刻係路中心影相啦 ( 之後愈來愈多人都好似我地咁係咁影 ), 今次有個專業的路人甲攝影師幫我地揸機。   9 點 3 係 MCG 有一場煙花 , 個個都去晒 Yarra River 對面的草地等開始 , 但廣播就話唔係沿河放煙花 , 問警察又唔知 , 不過心諗都唔會有咁多人一齊咁笨去錯地方掛 , 我地都係等住先。 等到喇 , 但 …….. 點解咁矮 ………. 咁流流地既 ?! D 煙花仲細過係大陸自己放果 d……. 附近既人都幾失望下 ………   仲有 2 個幾鐘先到倒數 , 公園四周都搭晒台 , 有人表演 band show 、跳舞 ……. 個個坐晒係草地上面 , 又玩螢光棒 , 十足十中秋節 , 真想拎個月餅出黎 : D 行番去 Fed Square, 有大型的音樂會 , 企係前排 d 人都幾 high, 不過我地都好難 high 足 2 個鐘 , 都係坐番係後面聽歌等倒數吧 ~   剩番一分鐘已經開始例數喇 , 大家都企晒起身 , 望住大螢幕倒數。最後十秒 , 圍住我地既高樓已經開始放煙花 , 直頭要大叫倒數啦 , 突然連頭頂的 Fed Square 都放煙花 , 超震撼 !!!!   要係市中心返屋企真係一 d 都唔易 , 人流密佈整個火車站、任何一條街 , 我地足足用左成個鐘先 ………….. 等到火車開 …………. 迫迫的新年呢 ~~~~   希望新既一年 , 旅程順順利利 , 開開心心 , 健健康康 !!!

回想之前為黎澳洲準備執行李 , 都會 列一張清單出黎 依家諗番轉頭 , 有 d 野係可以唔駛帶 , 有 d 就唔帶唔得   記得帶 : 1. 擋風褸 一件擋風擋雨又保溫既褸點少得 . 我地呢件風褸幾堅 , 又可以拆 / 加內膽 , 墨爾本有太陽時和無太陽的溫差相差很大 . 非常有用   2. 藥 傷風感冒藥 , 雖然呢邊有 , 但據阿詩講藥力太勁 , 食左會大昏迷   3, 錢 個人認為每人最少二千澳紙 . 唔係人人黎到澳洲就搵到野做 , 搵到又未必多人工 . 岩岩黎到洗費又會特別多 . 唔係叫你用晒 d 錢 , 但有 d 錢旁身就無咁徬徨   唔駛帶啦 : 1.       牙膏沖涼洗頭水 咁重 , 唔好帶上機呀 ( 不過我地帶左喎 …..) 呢邊全都有 , 沖涼洗頭水都幾好用 , 價錢又不比香港貴 . 牙膏 … 岩岩買左枝高露潔   2.       洗衣粉 都係重 , 黎呢邊買 . 一到步唔會洗衫卦 . 黎超市買啦 ( 我地又帶左黎 tim…)   3.       洗潔清 哈哈哈 ! 好白痴咁帶左枝 3 倍超濃過黎 . 間間 sharehouse 屋主都有提供 , 我枝 3 倍超露仲未用完 …   4.       電飯煲 K-mart $15 一個 , 好在我地黎左先買 . 因為我係大飯桶 , 呵   5.       JTB world guide 澳洲旅遊書 香港買左成 2 舊水呀 ! 資料又唔 update , 激死 ! 上網 search 景點最好 , 又或者去 information centre 拎小冊子 6. 原來睡袋都可以唔帶, 要用到時, 去K-mart 買, 十幾蚊有一個 . 如果要係香港買定 , 建議買零度 , 呢邊凍係上黎真係幾凍   最好就有啦 : Notebook 上網搵屋搵工搵地方玩都方便 d….. 間屋有得上網就最好 tim 啦  ...

2010 年 12 月 26 日 墨爾本   嘩 ! 今日 Boxing Day 好多地方都大特價 , 仲係只得今天 !! 澳洲搶錢日呀 !! 我地去左 Victoria 出名大既 Chadstone shopping centre . 今日多人到個停車場都唔夠位泊 , 好多車泊晒出去隔黎街 , 有 d 車泊埋上草地硬食牛肉乾 . Chadstone 大得黎有 d 似 IFC , 不過多好多平民價鋪頭 HoHo . 黎到澳洲咁耐都未見個一個地方有咁多人呀 , 今日好多間鋪頭都好似旺角 H&M 咁迫爆 ! 行左 8 個鐘 , 行都腳都軟 , 少少地買左幾件野啦 . 我買左件 SuperDry 背心 , 香港未見過買番件 XD Cotton On 一件 T-shirt 阿詩買左副太陽眼鏡 , 補番上次剪洋葱跌左 …. Cotton On 背心 , Typo 量匙 , 月曆 , notebook 套 黎左澳洲咁耐 , 終於買非食物既野嘞   詩 : 試牛仔褲時發覺終於可以著細兩個碼既褲 , 好開心呀 ^^ 突然減肥成功

2010 年 12 月 25 日 墨爾本 因為早一日吹親唔舒服 , 今朝起唔到身出 City 聽詩歌 , 無所事事食埋午餐先出街 , 去邊好呢 ? 都未試南半球過聖誕節 , 不如去沙灘啦 . 哎呀 , 今日唔夠熱 , 沙灘無 Bikini 女仔呀 T.T , 連游水既人都只得一兩個 , 好多都出黎野餐和 BBQ. 我地都有準備食物 , 帶左工廠送既 Cappuccino 蛋糕出黎開餐 . 聖誕節點少得聖誕老人 , 呢家人超誇張呀 , 帶埋個吹氣聖誕老人 , 同埋大帳幕 , 好勁呀 我地再去左附近一個景點 Black Rock House , 點知今日無開門 , 係門口影張相就走人 X’mas Day 好多鋪頭都關門 , 我地返屋企煮飯仔 , 再開多枝紅酒飲 ( 都係工廠老闆送既 2008 年紅酒 ) . 食物保持水準 , 但枝酒就 … 太重酒精味 , 要溝溝 Lemon Soda 先入到口 , 枝酒都係留番黎炒餸啦 .

2010 年 12 月 24 日 墨爾本 詩 : 今日無食火雞餐轉去 BBQ , 同樣咁開心 等埋我放工 ( 原本話 2 點放架 , 點知 3 點先走得 ) , 就同一班香港台灣 working holiday 朋友去左公園燒雞翼。 依到 bbq 同香港唔同 , 好似 d club house 咁係鐵板到煎黎食。 之前係 Gold Coast 公園都見過 , 果時都已經好想去燒 , 但燒野食要一班人先開心架 ! 真係辛苦晒 Edith 同 Carrie 去霸爐等咁耐 , 同埋幫手買食物的 Urica, Beatrice, Liky 同卓。一黎就燒最易熟既腸仔同埋豬肉串 , 台灣朋友的食法有點不同 , 佢地會用麵包夾菜同腸仔一齊食 , 我地又學下先。之後燒既係雞全翼 , 唔可以平放 , 真係燒到黑都未熟 , 我地轉另一個爐加水焗熟佢 , 攪左都有 45 分鐘先有得食。炒青椒同埋自製薯片都係好新鮮的燒烤菜式 , 太好味了 , 個個食飽飽時仲有牛扒食。加埋汽水同薯片 , 每人都係 aud$6.60 。 食完已經係 7 點 , 去 city 過聖誕既意慾都少了 , 就在 springvale 裡的教堂感受一下節日原來的意義 , 記念耶穌的誕生。我地去的是小教堂 , 一開始時就覺得有點不對路 , 完全唔知講乜 , 講的不是英文 , 應該是法文吧 ! 我地見到人地企就企 , 坐就坐 , 想去融入氣氛中但有語言上的距離感 , 另一種對聖誕節的感覺 !

2010年12月24日 墨爾本 平安夜 聖誕快樂!! 就黎過新年 , 希望新年勝舊年 !! (哈哈 , 10萬個老土) 圖書館將會關店4天 , 下星期三啟市 , 即係到下星期三先可以再放post 上黎 , 各位耐心等多幾日啦 XD Yeah ! 我今日開始放假 , 放到下星期三 , 新年可能再放多四日 阿詩點樣? 佢仲正呀 , 返埋今日就連放10日 !!! 尋日面包廠人人送一枝紅酒做聖誕禮物 ! Yeah yeah yeah 今晚會同阿詩班前工友搞聖誕大餐 , 火雞火雞火雞 Merry X'Mas !! 早幾日前食的Nando's , 澳洲好多地方都有分店 隻燒雞比較 "鞋" , 個汁就OK

2010 年 12 月 18-19 日 墨爾本 Parkmore 內有間蔬果鋪 , 賣既一般比 coles safeway 都要平 , 尋日放工就去左入貨 , 香蕉 $0.99 有 1kg , 一定要買番抽啦 !! 仲有買左茄子 , 節瓜 , 蕃茄 , 收獲豐富。因為是星期六 , 商場 5 點就已經收了 , 我地冇得食 food court, 就去左食雞。點左烤雞加 spicy rice & 沙律 , 個飯真係好好食呢。之後就去左 coles 大手入貨 , 買左莎莉蛋糕 , 忌廉湯 , 好多好多野食 , 好開心。 今日星期日我地都 Day off , 去完圖書館上網就返屋企煮飯仔。一餸一湯 , 先黎一個蕃茄洋蔥肉碎湯 , 4 個蕃茄 , 半個洋蔥 , 半碗肉碎就已經可以了 , 係澳洲要煲湯 , 可揀既材料真係太有限了。餸就煮左肉碎茄子 , 茄子係超級大 , 比起香港的大一倍呢 , 煮都要煮耐一點先熟透呢。

2010 年 12 月 13 日至 18 日 墨爾本 去完 crown casino 果晚 , 突然收到 carrie 的 sms, 話安哥果到已經冇野做喇 , 要等 4~5 日先可以開工做葡萄園 ! 嘩 ~ 又做葡萄園 , 真係痛到死左 , 上次做左一日葡萄園之後 , 對腳已經痛足多過一個星期 , 血汗錢真係唔易搵架 ! 打俾 carrie, 佢就話做露筍廠識既 sally 有車厘子 packing 做 , 我見咁快冇工開 , 就打去問下有冇位 , 結果就第二日就 6 半係離屋企步行 45 分鐘既油站等工頭車。因為卓要返 6 點 , 佢 5 點半送我去油站 , 我就係馬路邊食風食一個鐘 , 又凍又眼訓 , 但唔敢係街訓著呢。 6 點 8 架車先黎 , 我同 carrie 上左車 , 發覺 sally 不在 , 全是台灣女仔 , 諗緊係咪上錯車 , 唔理去到先算。 沿途經過樹林 , d 杉樹係高到見唔到頂 , 下面好多叢林 , 好似阿凡達 d 森林咁 , 一路上山 , 覺得愈來愈凍。一落車就見到車厘子樹 , 應該冇上錯車喇。坐左成個鐘車 , 仲要等多半個鐘 , 8 點先開工。工場有外國人 , 都幾多下 , 不過佢地一定係白工 , 人工又高但做埋同一樣野 , 好慘既感覺。去到就被安排企係運輸帶到 , 原來唔係 pack 野 , 係揀爛車厘子。條運輸帶一路係咁送 d 車厘子出黎 , 我就一路係咁撥 , 係咁揀 d 爛出黎 , 睇到好似唔係條運輸帶係到郁 , 係我自己係到郁 , 好多錯覺出晒黎。其實環境都幾靚 , 我地既位置係山頂 , 見到對面山既山頂有舊雲包住 , 仲有車厘子採掫旅行團。 做到 5 點就收工 , 問工頭先知要每人俾 8 蚊車費 , 仲要唔車到返屋企 , 好唔抵呀。夜晚開始有鼻水同喉嚨痛 , 諗緊第二日仲返唔返 , 打俾 sally 問 , 佢話唔返無錢俾 , 但身子要緊 , 無錢就算啦 , 扣埋都唔夠 $100 . 星期二病病地 , 但都去左卓間面包廠問工 . 去完圖書館之後返到屋企超辛苦 , 唔想再郁 , 一定要訓 , 已經捱唔住喇 , 好在卓仲煮左一餐好豐富既晚餐 , 有蕃茄西蘭花肉粒 , 體力回復了一點 . 星期三繼續等電話 , 去廁所都帶埋電話入去 , 真係好驚聽唔到電話 . 之後卓下午 sms 同我講聽二日 6 點返工...

2010 年 12 月 12 日 墨爾本 下雨 因為尋日安哥話細廠最後一日 , 咁依個星期日就可以同卓一齊放假。約埋三個香港朋友 Edith, Carrie & Liky, 兩個台灣朋友 Beatrice & Urica 一齊去 Crown Casino 玩 bingo, 贏左最少都有 Aud$100, 但 bingo 今日無得 book 無得玩。 (下圖是火車站不是賭場啊) 行去 casino 時 , 又遇到街頭賣藝 , 今次表演訓釘床 , 拋火把 , 但最後都失手 , 不過佢都好識攪氣氛。 去 casino 當然要去入會啦 , 有 coupon 同優惠 ma, 有張 coupon 可以換 Aud$5 cash 。我同卓兩個拎左 Aud$10 cash 就走左去玩我地至愛的骰寶 , 仲要唔係玩大細 , 係玩點數。我都唔記得第一個 Aud$5 買左 d 乜 , 總之就冇左啦。之後我地又睇之前開 d 乜 , 又有同一個感覺 , 係 9 號。我地放低左張 5 蚊 , 等荷官唱籌碼。隔離個阿叔就同我地唱左個籌碼 , 話唔使我地等。我地張個籌碼放左係 9 度 , 一開就中左 , 實左太 lucky 喇 , 一擊即中 , 即走。 咁我地就有 Aud$40 使喇 , 多謝賭場既贊助。 賭完仲參觀埋賭場個聖誕裝飾 , 每隔唔知幾耐就會有音樂同埋公仔出巡 , 睇埋先走 都肚仔餓了 , 去左附近個 southgate 商場搵野食 , 係 foot court 食個地中海店 Rhumbas ,   食左個 Rice potato ball , 酸酸地幾特別幾好食架 . 角落位有間 Veneziano 咖啡店有好多人幫襯 , 就幫佢買杯 cappuccino 試下啦 . 唔錯呀 , 泡夠厚 , 朱古力粉又香 . 食飽飽出面又落雨 , 行下商場先 . 今次去左 Melbourne Royal Arcade , 既古老又典雅既商場。商店都充滿了聖誕氣氛 , 有間賣木公仔 , 一 set 可以係唔同樣 , 太靚喇。 另一間賣朱古力 Koko Black, 有得係舖入面飲 chocolate, 但已係 full booking 了。廚窗的聖誕樹都有朱古力吊飾 ! 我地揀左 4 粒試下先。 左上正方形的係辣朱古力 , 太刺激了 左下一睇就知係杏...

2010 年 12 月 11 日 Melbourne 黎到澳洲已經第一百日 , 詩 : 呢三個幾月過得好慢長 . 卓 : 做到第七份工嘞 ! 很早已經習慣澳洲 ( 詩 : 獨立 ) 既生活 , 一日三餐自己煮唔成問題 ( 卓 : 未買一桶雪糕食呀 , 過兩日煮羊扒 , 好耶 ! ) , 之前斷斷續續既工作令人很擔憂 , 擔心無錢洗 , 擔心唔知幾時先儲到錢去玩 , 希望這一切都唔會再發生啦 ! 暫時都係工作儲錢 work hard 階段 ( 詩 : 黎澳洲咁耐依家呢份工係最辛苦呀 ! T_T)   最開心當然係 Gold Coast 返寫網頁啦 , 同 Ken 坐隔黎一齊上網睇股票 . 詩詩呢個時候係包店做牛做馬俾大陸人蝦 . 之後詩詩都入埋黎寫網頁 , 日日飲可樂 , 似去網吧多過返工 . 快樂既時光過得特別快 , 又係時候講 Bye Bye, 老闆娘即日通知就叮走我地 … 係網上搵工搵左成個禮拜都食白果 , 搵唔到近 , 但搵左個遠既去左剪洋葱 . 但住宿地方太惡劣 , 又搵唔到錢 , 我地做左兩日就炒老闆魷魚 , 執包袱返 Gold Coast … 返到去做左陣樓面 , 諗住騎牛搵馬 , 逐間酒店去拎表填摶下聖誕旺貴前搵到份酒店工 , 呢個時候網友 Edith 話 Melbourne 有蘋果園做 , 我地又再次執齊行李落黎 Melbourne. 點知蘋果太唔隱定唔知幾時有得返 . 蘋果工頭 Jim 又太奄尖 , 好難做到佢要求 . 臨急臨忙搵左露筍廠 ( 大廠 ) 返 . 呢個世界太多衰人 , 遇著個賤既介紹人 , 做左七日又無左份工 , 介紹費都徒埋 .. 但 Edith 轉頭又搵到另一個工頭 ” 安哥 ” , 我地一齊做左一日葡萄園 , 詩詩可以繼續跟 ” 安哥 ” 搵食去左 ” 細廠 ” 做露筍 . 我唔理三七廿一 , 逐間工 \ 廠問請唔請人 , 唔試一定無 , 試左就多個機會 , 好彩隔三條街間面包廠叫我第二日返工 , 與此同時東區食品廠又叫我見一見面喎 , 咁我緊係揀近近地啦 , 唔駛車錢麻 , 暫時同班印度人相處幾好丫 , 今日又學識 sau ce ko 係 Halo , good morning , good afternoon 咁解 ,...

2010 年 12 月 10 日 Melbourne 卓 : 返面包廠除左當舉重練粗對手臂 , 仲可以學識印度話 . 印度話你好嗎係 he har ley. 我很好 wa di up 謝謝 done li wa ded 尋晚無啦啦好好餸 , 煮左三個餸呀 !! 黎澳洲煮得最豐富就係呢餐 ! 好耶 , 一黎有新菜食 , 二黎阿詩既廚藝又進步左嘞 ! 第一碟免治肉碎炒雜豆 第二碟豆豉洋葱炒八爪魚 第三碟清炒時菜 食完飯洗碗見到出面有彩虹呀 !   呢一排我同阿詩都晨早 5 點就起身返工 , 放工返屋企休息下就煮飯 , 夜晚 9 點就訓覺 , 日日如是 . 前一晚都有煮新菜 , 因為買左包豆豉 , 就煮左碟豆豉苦瓜肉片 , 用豆豉炒香得黎又有香港屋企既味道 : )   有時都煮西餐架 , 呢個係蕃茄汁薯仔黑椒磨菇雞肉螺絲粉

2010 年 12 月 7 日 墨爾本 有個遲我一日返工既印度新仔 , 我日日都會 part 佢做同一個部門 . 今日我地都係返 11 點 , 又黎整酥皮巻 , 整完無耐又調左去新部門整牛角包 ^^ 一大塊面粉團會放入部機 , 出黎變成一巻巻細牛油面粉卷 . 印度男仔果邊會將佢地屈一屈變做牛角樣 , 我呢邊就放佢地上架等放入焗爐 . 望住佢地有得睇無得食都有 d 肚餓 . 士頭心有靈犀咁捧左一盤岩岩焗好既牛角包出黎分俾大家食 . 平時凍既牛角包我唔中意食 , 但呢個岩岩焗好又香 . 好好食呀 : D 小休果陣班印度人仲請左我食件印度咖哩餅 , 又唔係好辣喎 , 我食完都無出汗 . 放工新仔好熱情咁叫我坐佢架車返屋企 . 見佢盛意拳拳就坐啦 , 兩分鐘都唔駛 , 轉左兩個灣就返到 , 原來佢唔食雞旦喎 , 咁工廠好多餅呀包呀佢都無得食了 , 我唔介意食埋佢果份架 : )

2010 年 12 月 6 日 墨爾本   卓 : 今天第三天工作 , 同過去兩日做既野唔同晒 朝早六點開工 , 今朝早我呢邊條生產線有新搞作 : 整蒜蓉包 ! 我個崗位係幫每條面包團界交叉 . 界界界無停手 , 漸漸地入自動模式 , 無雖思索係咁界 之後幫部機大清潔 , 轉眼間就十點幾 . 接住落黎摺左一陣紙箱 , 跟住就將酥皮卷入盒 , 之前果兩日另一個崗位 2 點半就收工啦 , 今日 2 點半堆酥皮卷仲不斷跌緊落黎 , 好攰呀 , 幾時完呀 ! 再入多兩個鐘 , 終於搞清潔 , 即係收得工嘞 , 好耶 ! 聽日返早十一點 , 又唔知放幾點呢   5 點先放工唔想返屋企煮飯 , 就同阿詩出左街食飯 . 今晚無食 ” 香江 ” 既五蚊飯 , 食左隔離 ” 頭淡湯 ” 既煲仔飯 . 呢間既牛腩煲仔飯好食喎 , 可以 encore 食完食趁有時間去圖書館上網先 , 咁岩遇到 Peter Lam 同新朋友 liky 和 carrie. Carrie 聽日都去埋阿詩間露筍廠返 , 好熱鬧呀 ~  

2010 年 12 月 4 日 墨爾本 好消息好消息 , 經過一輪搵工攻勢 , 終於俾小弟搵到間面包工廠返工 , 總算雨過天晴啦 ^^ 早幾日係隔黎街逐間拍門問請唔請人 , 咁好彩隔日收到電話叫我第二日返工 , 真係超好彩呀 間廠 9 成係印度人 , 得我一個係華人 , 波士似乎係法國佬 . 工作不外乎搬面包和將旦糕仔入盒 . 計過時每 12 秒就將一盤 5kg 面包右邊拂去左邊 . 工作完結前會清潔地方 . 最中意搞清潔 , 有得郁下行下 , 時間又快過 . 今日已經返到第二日 , 有員工衫褲更換 , 逢星期日休廠 , 都幾好架 . 做番打工仔就安心 d , 經過屋企附近果公園都有心情玩番陣 ^^

2010 年12月2日 - 墨爾本   詩 : 唔使返工的日子 , 可以幾早起身都唔使鏟 , 所以我就四點十好乖咁起身煮早餐俾卓食。因為卓今日係第一日返麵包廠 , 點都要支持下 , 煮左個公仔麵 + 水餃 + 利賓納 , 咁就一定有能量返工啦。睇住佢返工後 , 我再訓過 , 訓到十一點呀 , 總共十四個鐘呀 !!! 約左 edith 十二點係火車站等 , 我估我十五分鐘就可以行到 , 點知十五分鐘先行到去路口 , 要行十分鐘先到 , 太遠喇 ~ 我地今日準備去 Parkmore shopping center, 果到係大型商場 , 有 bigw, kmart, food court………. 我地要搭 813 巴士 , 但等極都只有 902, edith 打電話去問幾點有車 , 就話一點零九分就黎到 , 我地等呀等呀 , 等到一點四十五分 , 一共等左一個鐘頭四十五分 , 我地真係訓練有素 , 一係就癲左 , 係香港等咁耐晨早就走人啦。 去到我地就食 food court 食海鮮籃 , 9 蚊兩個人 , 大就大碟 , 但有 d 凍凍地 wo, 都係 goldcoast 果個好食 d 。 食完去左 muffin break 買咖啡飲 , 見到有新野 , 係 ice chocolate 同 ice mocha, 碎冰黎既 , 仲有 cream 係上面 , 但太多牛奶味 , 朱古力味冇定企呢 ~~ 下次都係飲番 cappuccino, 厚厚的泡。行 bigw, 有太多聖誕禮物 package 賣 , 好精美 , 樣樣都想買。行行下 , 最可怕既係行過玩具果到 , 突然有 bb 叫 , 原來係 bb 公仔 , 仲識跳 , 唔知真係驚。卓收左工黎接我地 , 去左 kmart 行 , 有瑞士蓮朱古力 christmas 版 promote, 我地試食完 , 個職員就問可唔可以影張相做 promotion, 我地都影左呢 , hehe 。 去番 springvale 食越南粉 , 食左第二間 , 都係上次好食 d 。

 2010年12月1日 - 墨爾本 (引言 by卓: 之前返左7日果間露筍廠規模較大 , 稱之為大廠 , 依家阿詩返果間叫細廠. 大廠衰人當道...) 詩 : 突然安哥車左我地去大廠開工 , 真係大穫呀 , 因為唔知個賤老闆會唔會出 d 咩賤招去整死我同 edith 。幸好 , edith 男朋友寄左 d 口罩黎澳洲 , 我地兩個都戴住口罩去開工。我地去到都諗 , 大廠好多人開工架 wo, 點會要細廠 d 人過去 , 會唔會係大廠隔離包菜果到 , 咁就唔使見到 d 衰人。好 , 我地係車上等到七點入去開工 , 跟住安哥一齊入去。經過包菜工場冇停到 , 死喇 ~~~ 即係要入去衰人既地盤。入到去拎工具 , 再四圍望下 , 發現大廠少左好多人 , 有成一半人唔見左。我被安排企入去接露筍 , 哈哈 , 又係我最弱的位置 , 一開波 , 細廠既人好多都未做過咁快 , 過左 5 分鐘 , 成條輸送帶都停左 , 個賤老闆完全話唔掂 , 重新分配人手。我就被安排去貼牌仔同綁露筍 , 始終都係我既強項。我企的位置很不利 , 前面有個箱頂住 , 隔離又唔企過 d, 我要伸到好長先拎到 d 露筍 , 超麻煩。之後又再被安排去第二條輸送帶最後既枱到做貼牌仔綁露筍。果張枱係放成籃人地未有時間綁既露筍 , 我綁的都係中型 size 既露筍。隔離枱果個鬼肥婆成日霸住晒 d 大型 size 露筍 , 因為唔使點整就已經可以超易綁好 , 好黑人憎呀。綁綁下 , 個賤老闆企左係我隔離綁 , 佢同個肥婆都係咁衰 , 又係綁大野 .\ _ /. 今日就勁喇 , 應該綁左平日 2 倍咁多既露筍 , 十萬個攰呀。放工時 , 個天左邊係晴天 , 右邊係好大舊黑雲飄緊過黎 , 個天好似跌左落黎咁 , 一路回家時 , 落超大雨呀 , 好似每日放工都落雨 wo 。我架車的工友們都係好人黎 , 同好攪笑的。因為第二日露筍廠會冇工做 , 會去葡萄園做同星期一相同既野 , 即係剪枝啦。我諗都係唔好了 , 隻腳由星期一開始都仲痛緊 , 要休息休息了。不過工友們講係 easy job, 要 shopping 就要 money 等等引誘我地開工 , 我地最終都決定身子要緊 , 唔做。

2010年12月2日 墨爾本 Springvale... 因為新露筍廠要女唔要仔 , 阿詩就同 Edith 去左開工 , 留低我又要四處搵工了 =.= 無工開無所事事留係間屋 , 順理成章做左住家男 , 或者阿四 , 又或者賓賓 住家男的生活由朝早 5 點開始 , 鬧鐘一響就付責鏟醒爛訓既詩詩起身返工 , 未等佢起晒身轉頭就入廚房準備早餐 , 叮杯熱水俾詩詩沖茶飲 , 爛訓詩返工後我就繼續打擾周公 zzzz 8 點半再次起身 , 食完早餐後出去超市拎報紙搵工 , 份報紙逢星期四出 , 諗住早 d 出去拎啦 , 點知朝早未有要下午先有 !! 轉道去圖書館睇報紙 , 上陣網搵工 , 希望快 d 有好消息啦 , 此終無工開會令人好不安 …. 番屋企洗衫食飯 , 趁好天晾 d 衫出去先 , 如果好天既話晾 3 個鐘咩都乾 , 曬鹹魚都仲得 正想再出去拎報紙 , 個天無啦啦風雲變色落大雨 , 拿拿臨跑番屋企收衫 ….   講番呢幾星期我地煮過乜餸啦 … Springvale 買餸比較平 , 係度食菜多過係 Gold Coast 呀 仲有煲過湯啦 , 豆腐 ” 嚴西 ” 湯 , 失左手無乜味 … 豬骨湯補下腳力 漢堡扒配豆角炒旦 薯仔洋葱豬扒 仲有打完邊爐食淨既蝦 , 炒番碟蝦仁炒旦 ^^ 其實我地唔係日日咁好餸 , 簡單 d 粟米雞扒又一餐 : ) 岩岩開左張電話咭Lebrara 打長途電話 打番香港固網1仙澳紙1分鐘 , 可以打多d電話番屋企了 :)