浪跡天涯 漫步袋鼠國 我們的澳洲日誌

爸爸未揾到工前，做了全職爸爸3個多月，餵粥仔、沖涼、氹訓覺都一手包辦，愈來愈熟練。霏霏沖親涼都表現冧樣，爸爸温柔地洗面洗頭，有次仲沖到訓著埋。 去公園玩，緊係爸爸陪好玩d啦，抱上抱落彎低腰，媽媽真係冇乜體力玩。 依日就係見成工果日，爸爸都陪阿仔玩，霏霏都開始知道坐車車好玩，有時行商場見到有車車都會眼金金。

霏霏頭髮長左好多，爸爸要同佢剪頭髮，我是要求剪Bob頭的。我食食下飯，老公就叫我去驗貨，我再說是要剪Bob頭，老公加多幾刀後，霏霏新髮型面世了。 變得BB左好多，仲攪笑左。有人話係阿旺頭，有人話好可愛。霏霏你大個會唔會問我地點解剪到你咁短呢？ 講左食麥記create your taste 成個月，今日終於試左喇。 有四部機，好多人都特登黎試。 我㨂左Angus beef,燒菠蘿，其他已包既配料就㨂足晒，三種芝士，蕃茄，焦糖洋蔥，酸瓜，辣椒。味道其實同Angus burger 個set好似，因為燒菠蘿好細，食唔出。 老公冇㨂Angus beef, 但有煙肉同燒菠蘿。 食完霏霏玩左陣麥記公園，大伯帶左佢去玩滑梯，個傻豬驚玩滑梯，扭計喊。

今日兩家人各有節目，老公話要去飲咖啡，我就上spoon 揾下附近有乜cafe 正，一家三口出發去嘆下。去左屋企附近既suburb Glenhaven, 果到有間人氣頗高cafe "The Tuckshop", 出名食cheeseburger 同 mocha, 兩公婆各自點左mocha, chai latte 同兩份cheeseburgers，burger 好香口鬆軟，有別於麥記。 我地食飽飽同餵飽飽霏霏後，去左附近既公園玩。霏霏仔識玩搖馬馬，雙手會扶實，身體會前後郁動，仲笑到格格聲。 我地而家既快樂好大部分來自霏霏，望到霏霏開心笑，我地自然就笑起來。一家人總要有小朋友才完美，辛苦照顧寶寶也值得。

小霏霏十個月大喇！ 依個小BB已經小左BB樣，變左小朋友樣，應該關有5隻牙仔同濃密既頭髮事。依個月轉變得好快，突然唔食媽媽奶，有日我揭起件衫，佢就狂喊又擰頭，之後點氹都唔食，我都被迫放棄餵兩年既計劃。唔食媽媽奶後，就開始活躍左，唔再係坐成日都係同一位置，玩具係前面都唔識拎既懵豬豬了。冇食媽媽奶一日後，識得倒後爬；三日後，識得向前爬；一星期後，識得全屋爬倒亂；兩星期後，識得爬上一級樓梯。學習速度以十倍速度增長。 佢冇飲媽媽奶，都唔代表食奶樽多左，正常一日三餐奶，佢係可以連早餐奶都食得好扭擰，有時係要一啖奶一啖餅，有時要氹下先食，有時食1安就唔食，真係好難服事，又浪費成支奶。不過食粥仔果兩餐食得幾好，有時仲食到兩碗。可能鍾意食固體多過奶啦。 小霏霏依然係開心BB，媽媽笑，佢又會跟住笑，仲要超級甜，好似望住女朋友咁，媽媽又點會唔愛依個麻煩小男朋友丫。

2011年完結澳洲WHV回港一刻，心想：回香港是現實世界？但留在澳洲感覺更真實，有機會回去嗎？ 2013年家人也有意移民澳洲，於是開始找agent 申請。 申請visa基本上有以下流程: -上澳洲移民局查skill selection 要穫取多少分數 -考ielts -準備好job ref letter，做skill accessment -online 遞交express of interest (EOI)，澳洲會審核你的資料 -收到澳洲invitation to apply visa - launch apply visa - 按澳洲要求去指定地點做body check，和辦良民證 - visa granted 等了兩年申請完成，2015年6月這一刻該已踏在紅土上😁

話咁快霏霏已經六個月大，其實湊BB除左要細心有心機外，仲要有無窮既體力。 霏霏的糧食 係陀緊霏霏時已經有決心餵母乳，目標係餵到六個月。對於一個做事只有三分鐘熱度既媽媽，係一個遙不可及既目標。坐月時可以日餵夜餵，但一返左工就要開始做泵媽。香港政府成日都話要提倡母乳餵哺，但配套就相當有限。例如：商場育嬰室得一個，成班bb排住隊，餓起上黎都等唔切；公司唔容許你office hour去泵奶，好多時要偷偷去泵。其實返左工奶量大不如前，bb唯有要食幾餐奶粉。 霏霏的片片 我都算用得多牌子片片，原因都係唔想出現爆屎係情況，實在太恐怖，做餐懵。由初生Huggies 0碼，pampas 細碼，merries 細碼，monny 中碼，直到nepia  中碼, 我最愛都係nepia, 包得好大範圍同吸得好，仲夠平。片片係消耗品，換一條都係錢，緊係要格下價，最平應該係藥房買。雖然霏霏去親大都好臭，我都要習慣唔怕污漕。 霏霏愛玩玩 霏霏開始大個，對外間既事物好奇左，我地就買d玩具俾佢，望下又好，聽下又好，活動下都好，俾佢係玩樂過程中發展一下身體既機能。 投射音樂盒：最初佢只會聽住歌訓覺，但大大下識㩒掣轉歌 麵包超人軚盤：放係床仔旁，得閒用手轆兩轆 長頸鹿蘇菲牙膠： 三個月以下唔太識控制點放入口，只係陪係隔離。而家就識錫蘇菲嘴，咬蘇菲腳 香蕉牙膠：size 好啱手型，任何一個部位都可以咬，咬得好滋味 手搖鈴：係759買的，聲音超清脆，暫時係霏霏至愛 媽媽心聲 頭兩月係大家既適應期，自己又唔識湊，好多時唔知佢想點，精神狀態好差，真係好易有產後抑鬱。不過望見bb一日一日大，幾辛苦都捱到，願意為他犧牲。 第三至四個月時係在職媽媽，每日返工都好掛住bb，唯有泵奶才可跟bb有連繫，每日都超怱忙返屋企，爭取時間同bb相處。 第五個月做左全職媽媽，長時間對住bb, bb都開始跟自己，做左痴身豬。雖然忙到早餐午餐都冇時間食，但霏霏既甜笑已經滿足我既心靈，好似話俾媽媽知媽媽照顧得好好。

經過了39週的懷孕期，小霏霏終於在9月29日出世喇，體重有6磅9。 每個BB都包到好似雪糕筒咁，霏霏小寶寶都安靜地睡著。 這是第一張同霏霏的自拍照。 從此以後，我們是一家三口了。 霏霏連打呵欠都咁可愛 住左5日醫院，終於回家了 霏霏在認識這新地方，在跟小熊熊聊天呢 我們這對新手父母都在適應中。。。小霏霏每隔兩至三小時就要食奶，半夜都係要食兩次，我地冇覺好訓，每日得三小時睡眠時間，所以霏霏訓左我地就會訓，盡量爭取休息時間。為左BB食得飽，會長肉，幾辛苦都值得。 值得一讚既係卓卓老公，半夜都肯起身照顧霏霏換片片，有他的支持才捱得過頭三個月 ，