浪跡天涯 漫步袋鼠國 我們的澳洲日誌

2010 年 11 月 27 日 墨爾本 Geelong 一早上左工頭安哥間車 ( 唔知佢係印尼定係柬埔寨人 , 佢個名個人就叫安哥 ( 國語 ) ) 以為去露筍廠啦 , 點知個識個廣東話既柬埔寨華僑阿姐話今日我地去剪枝喎 , 呀 ! 咁咪又做農場工 ! 仲以為可以食左出前一丁先開工 ! 帶唔夠水喎 !!! 架車越行越遠 , 經過 City , 黎到 Geelong 郊區 , 原來今日露筍廠唔開 , 帶我地黎剪葡萄樹枝 , 喎 !! 好大遍葡萄園呀 !! 有好幾個山頭呀 !! 葡萄園環境好靚呀 , 一場黎到影多幾張相先 , 上次做蘋果無影到 , 今日影番飽 葡萄還未成就時 , 今日工作係除大腿以下既枝 , 可以用剪刀 , 但用手用腳係快好多 , 當然唔係徒手啦 , 有手套架 剪枝時間好快過 , 安哥又 Hea , 成班伙記一齊 Hea 做 , 時薪都幾好做 , 有時唔忙好似黎左郊遊欣賞下風景咁 : )   3 點有小休仲成班人訓晒係草地 , 突然傳來陣陣鼻寒聲 ….. 安哥真係訓著左 , 我地勁 Happy 唔駛 Do , Hahaha   勤勞了一天 , 大食一餐 KFC 當獎勵自己 ^^

2010 年 11 月 27 日 墨爾本 史賓威 (Springvale) 講左三個星期 , 今晚終於打得成邊爐啦 , 由於我地同 Edith 都俾露筍廠踢左出黎 , 我地三個得閒就去買料 , 買完料我地拎埋個電飯煲 , Peter 拎碗筷 , 一齊去 Edith 間屋打邊爐 , 正呀 值得一讚係 “ 澳洲第一家 ” 既十全十美丸係好好食喎 ! 一包入面有齊唔同既打邊爐丸 ! 加埋小肥羊既湯底係勁好味 一邊食一邊睇機場海關電視節目 , 尊講 d 人境澳洲既人帶左咩違禁品 , 有兩個阿差打左幾包沙炮 , 呢兩個人真係勁搞笑 電飯煲打邊爐唔夠火力呀 , 差唔多 3 個鐘先打完 聽朝仲要早起身返新工 ….

2010 年 11 月 27 日 墨爾本 史賓威 (Springvale)   一肚火 !!! 首先露筍廠出糧逢星期三截數 , 星期六會出糧 , 例如番星期六到下星期五 , 下星期六會出星期六到下星期三的糧 , 淨番 2 日留到再下個星期六出 露筍廠返左 7 日 , 由上星期五到今個星期四被人炒左 , 我地估計係個包租婆玉姐搵到人住佢間爛屋 , 所以介紹露筍廠俾佢地做 , 我地又唔會搬去佢間爛屋 , 所以賤人夾埋老闆求其搵個藉口踢走左我地 >< 今日星期六出糧應該拎到六日糧 . 初頭賤格玉姐話一個星期有每人可以有一千 , 仲有五個星期做 , 咁果陣覺得 $100 無問題丫 , 以家 6 日得 $700 末俾人踢走之前已經唔想俾個賤人介紹費每人 $100, 以家賤人仲話做多個一個星期都要俾介紹費人頭 $100 , 嘩 !! 擺明屈錢 !! 由於唔係白工 , 工資係現金 , 我地舊錢班人竟然唔係直接俾我地 , 係去左賤人手上 , 去到佢手仲唔即刻無左 $200 !? 我地又好快咁係佢手中搶番舊錢 , 出糧都不愉快 >< 講番個介紹費 , 唔俾又驚淨番果一日糧佢吞埋落肚 , 又驚唔俾既話會有咩危險 , 我都佢計數 , 最後每人俾 $70… 肉痛 最緊要出埋最後果日糧   好消息 , Edith 搵到另一個工頭 , 星期一番新工 , 係另一間露筍廠 各位既留言好靈呀 , 東廠唔打打西廠

2010 年 11 月 26 日 墨爾本 連續工作了 7 日 , 平均每日 10 小時 , 頭 3 日做唔慣粗重野好攰 , 到第四日轉番對波鞋返工廠就好好多 , 身體和工作節奏都已適應 每朝返到廠都要係 ” 飯堂 ” 爭位食早餐 , 又迫又少時間 , 但都食到個公仔面既 今日好奇怪 , 鬼佬旅行團都興參觀工廠既咩 ? 今日無啦啦黎左班公公婆婆黎參觀 , 行左個圈影下相 , 10 分鐘就走人 , 以為大陸團先有呢 d 景點 tim 工廠有兩條生產線 , 一邊全部都係柬埔寨人 , 有幾個印尼人 , 一邊全部都係中國人。我地被安排係柬埔寨人果邊做野 , 佢地全部都係講同一種語言 , 不停咁嘰嘰咕咕。 詩 : 我係生產線既最後位置 , 我隔離有個中國女人 ” 正蘭 ”, 佢係北方人 , 所以有時都唔係太明佢講乜 , 不過就好好人 , 做到悶時可以同佢講幾句。而我對面線既都係柬埔寨人 , 佢地有時同我都有講笑 , 仲教我偷懶 ( 都係有 keep 住做 , 只係唔多露筍時 , 唔使做咁快 ) 。 個老闆真係食蕉架 , 佢竟然話我成日同正蘭講野 , 掉我入去接露筍。嘩 , 我同正蘭都係一日講得兩三句 ja, 咁都係成日 , 咁佢 d 柬埔寨人一日到黑係咁講係咁講又算係冇講野 ar, 完全係被種族歧視 law 。我同對面既柬埔寨阿姨掉轉左工作後 , 大家都頂唔順 , 完全唔習慣 , 變得超慢。結果我地都唔理老闆 , 掉番轉 , 即刻快番好多 , 仲會快到冇晒露筍綁 , 老闆唔好攪咁多小動作 la 。果個柬埔寨阿姨好攪笑 ga, 有次老闆背住企係我地隔離 , 阿姨就用橡筋射佢 , 因為大家都唔係太鍾意個老闆。 每天都連續工作 9 至 11 小時 , 只有 2 個 15 分鐘小休 , 同半個鐘食飯 , 其餘都係企係到 , 同以超快的動作綁露筍 , 真係攰到扒地 , 一放工就超快的煮晚飯同第二日帶返工的飯 , 最早試過七點九就訓 , 太陽都仲未落山。雖然大家都好辛苦地工作 , 但都係為左之後有得去玩 , 點都會堅持落去。 今日個天又落雨 , 一個似曾相識的天氣 , 我地又俾人炒左喇 , 點解會同上次一樣架 , 即時死亡。坐車返到屋企 , 司機就同我地講聽日唔會黎載我地 , 話老闆唔要我地。咁我當然問死因啦 , 佢就話我做得慢同卓幫唔到手 , 但自問我唔係慢 lor...

2010 年 11 月 21 日 墨爾本 一連三日的 露筍廠 工作令人累散了 , 回家便是吃晚飯 , 然後即訓 zzz 工廠工人好多都係印尼 , 馬拉 , 柬埔寨人 , 不斷嘰呢咕嚕都唔知佢地 up 乜 就講下每日 run down 啦 每朝 4 點 8 起身 , 5 點 2 上 Van 仔返工 , 架車會四圍接載其他工人 , 6 點半返到工廠 , 可以食陣早餐抖抖 . 7 點工場運輸帶啟動全世界開工 詩詩的崗位係將一束束露筍附上超級市場的標籤 , 再用橡根縳好 . 機械式的重覆又重覆 …. 很不幸地 , 佢係無得坐的 我的崗位 , 就如其他男生一樣整天在搬運 , 每 48 束露筍放在箱上 , 每箱又搬上木板 , 有時會搬箱露筍去磅 , 又有時會搬上架 , 好在一箱唔係好重 , 7 至 12 kg 啦 , 同包米差唔多 9 點半放小休 15 分鐘 , 扒幾啖飯補充體力 . 12 點放飯半小時 , 3 點 9 收工 , ( 不過今日 OT 到 5 點 , 2 點 9 小休 15 分鐘 ) , 每天工作 8-9 小時不等 . 返到屋企 5 點 , 唔想煮飯就會出街食 … 點可以唔煮丫 , 最少要煮第二日帶飯 詩詩夜晚的訓覺時間 : 第一天 10 點 , 第二天 9 點 , 今晚 8 點 . 照推斷 , 要訓 12 個鐘先夠既佢 , 過多幾日佢要係工場同露筍一齊訓了 我 …. 想唔沖涼就訓 Work hard   俾我地發現有個台灣仔崗位超 ” 筍 ” ,   每日只係到捪紙皮箱和膠箱 , 貼下 label , 又唔洗搬搬抬抬 , 又唔趕 , 仲要人工一樣 !! 就係要綁一條條既露筍, 詩就負責綁上面果條橡筋同牌 依隻就係工廠入面隻狗狗, 超級可愛的, 真係用黎看門口?!   廠裡的環境, 左右兩條生產線, 一開工就成70幾人 廠外面, 遠處有大農地, 有牛同羊行過

2010年11月17日  墨爾本 Springvale 星期三 星期一星期二都有返蘋果園 , 朝頭早4點半身 , 天都未光5點3坐工頭Jim 架車去Yarra Valley 開工  阿詩病左所以兩日都無返工....但唔洗擔心 , 阿詩今日己經好番了 蘋果園天氣比較多變 , 朝早有些雨水得10度以下 , 下午出太陽就26, 27度都有 . 落雨一樣開工 , 因為會穿雨褸和水靴 蘋果仲係成長期 , 一棵樹有太多果會分薄營養 , 我地就要分大中小meet 走多餘既果, 基本上大部份既果都會meet 走 , 密密meet 無停手 阿Jim 好"痷尖"...有成日話我慢 , 尋日收工叫我休息兩日先 又兩個人一齊無野做!? 即刻打電話俾玉姐 , 她是我地之前搵屋時話有工作介紹的人 好在仲要人開工 , 結果今朝阿詩去左露荀廠開工  , 我就待業中... By 詩: 今日一樣要坐豬仔車去露荀廠開工, 要坐成個鐘車, 一去到唔係開工, 係食早餐等七點開工。環境都幾好, 員工飯堂隔離就有d牛牛提供鮮奶, 我地就可以免費任用。一開工, 有d打仗既感覺, 因為條運輸帶"滾滾"聲咁送d露荀過黎, 分晒大細, 之後就由我前面個女工綁筋根係個露荀尾, 我就將"woolworth"同"coles"既牌仔用橡筋綁係中間, 再切齊尾尾。7點開工, 9點半有個break, 12點就食飯, 直到收工4點。食完飯之後開始覺得攰, 因為冇左3點既break。做做下就已經唔知自己做緊乜, 完全係機械化, 不停的自動工作。為左無咁悶, 已經帶左mp3, 一路聽歌一路做。點知mp3不停loop住6首GEM既歌, 我就聽足3個鐘, 等到lunch時再set過。我要keep 住做落去, 唔好停, 我係到都未做一份工超過2星期ga。 62 個月快樂:)

上兩個星期還待在 Gold Coast 當酒樓樓面 , 還在擔心入不敷支 … 幸好 Edith 有蘋果工介紹 …. 事隔兩星期已身在墨爾本等明天蘋果園開工 , 好好遊覽漂亮的墨爾本 … 際遇時好時懷 , 無法預計 , 轉變得快 , 這就是 Working Holiday 的生活麻 . 同墨爾本的天氣一樣 , 尋日 30 度 , 夜晚開風扇 , 今日 12 度 , 今晚開暖爐訓 , 這裏的天氣出名是 ” 四季 ” , 就算一天都可以出現四季的天氣   等開工咁得閒 , 繼續四圍玩先   2010 年 11 月 13 日 墨爾本 雨 澳洲人喜歡星期六日間時間維修鐡路 ? 坐坐下火車要轉巴士 ! 因為佢地要維修 4 個站的路軌 . 諗起香港的火車地鐵更為細心 , 他們只會在夜晚定期維修 . 一年好快過 , 話咁快就快到聖誔 , 市中心商店街 Broke Street 今日有 Myer 聖誔花車巡遊 , 氣紛熱鬧 , 但點都唔夠香港咁多人逼 , Haha 花車唔係多 , 大朋友小朋友載歌載舞比較多   蝙蝠車都由 Gold Coast 過左黎   演員散場後混入人群一齊影相 , StarWar 仲去左麥記食番個包 商場 Myer 內有個聖誕小鎮 , 擺 賣聖誕飾物 , 仲有得寫信俾聖誕老人 .   詩詩的聖誔願望成真了 , 我地帶左個聖誕老人水晶球返屋企 .   反正買左火車巴士一日票 , 搭多幾程先抵返 . 無所事事就去左 Richmond 逛 IKEA . 澳洲的 IKEA 比香港有更多 showroom , 但貨品種類其實差唔多 . 澳洲 IKEA 比香港大嗎 ? 係呀 , 個自取貨品區勁大 , 成個貨倉咁大 , 有 3 層樓咁高架 , 頂層貨品要用升降台拎 .   2 個半月無剪髮了 , 頭髮長長吉住隻眼唔舒服 , 尋日詩詩做左髮型師   聽朝 5 點 3 就要上車開工了 …. 日出而作 日落而休 有工返!! 有錢儲 !!

2010 年 11 月 11 日 墨爾本市   今朝好叻起到身出街玩 ^^ 第一站坐火車到 Brighton Beach 尋找海邊小屋 . 下車後朝 Middle Brighton 方向沿海邊馬路走大約 10 分鐘就到 . 大約有四十幾間木屋仔 , 各有特色 . 朝頭早影相會背光 , 建議黃昏再黎過 , 應該會更靚   間澳洲屋點可以唔影 !?   第二站坐火車返 City. 架火車去到半路突然壞車 , 逼住要轉電車返市中心 ….   去維多利亞女王市場 Queen Victoria Market 醫下肚先 . 呢度咩都有得賣 , 係香港街市同香港廟街既混合版 . $6 有半打蠔 . 買左先發覺蠢左 , 隔黎檔賣 $10 一打 !!   第三站坐免費電車去聖派克大教堂 St Patrick’s Cathedral . 這是澳洲境內最大的哥德式建築教堂 . 本書講得無錯 , 間教堂真係堅大 ! 仲堅靚 ! 有很大坐的管風琴 , 彩繒玻璃 …….   第四站係隔離既省議會 . 如果要開議會呢度係唔開放 , 不過到十一月咩會都開完 , 就可以跟導賞團入內參觀 . 院內保安嚴密 , 第一不准自遊行 , 第二入內要經過金屬探測 ! 入去睇裝修 , 上議院屋頂既天使浮雕每隻都有唔同意思 , 仲有好多地方都鑲左金 , 唔怪得保安咁嚴啦   好戲在後頭 , 最後一站坐 #16 電車去 St Kilder Beach 睇夜晚回家的小企鵝  -- 神仙小企鵝. 成年的小企鵝只有 34 cm 高 , 當入黑時就會回岸休息 , 成班遊客就係等呢一刻親親小企鵝 . 等等下唔駛到天黑 , 突然石隙間走左隻小企鵝出黎 , 就係我腳前出現 ! 佢個頭申下申下好似未訓醒咁 , 很可愛的 . 陸續都有小企鵝走出黎同大家 say hello. 影企鵝唔俾用閃光燈 , 有工作人員用紅色電筒幫大家照住黎影 . 小企鵝對鏡頭一點都唔陌生 , 不停的擺 pos, 站得高高 , 再跳來跳去 .   距離開工仲有 ….4 天

2010 年 11 月 9 日 墨爾本市中心   好消息 !! 下星期一開始一齊去摘蘋果 , 有工返等於有收入了 : ) 開工前當然要好好玩埋呢幾日啦 , working holiday 辛苦搵銀都係為左玩 , 有時間有心情緊係玩左先啦   太懶訓了 , 訓到 10 點先捨得起身 ….. 搭火車到墨爾本市中心 , 今日係 Melbourne Central 站落車 , 經圖書館 State Library 旁直走到達第一個景點 舊監獄 Old Melbourne Gaol . 始建於 1841 年 , 現在仍保存完好 . 門票包括一個導賞團 , 由獄警帶住我地參觀監獄內部 , 有時仲當我地犯人咁 , 男左女右一字排開點名 , 幾好玩架   第二站去隔離街既皇家博覽會場 Royal Exhibition Building , 不過今日做左墨爾本大學既考試場地 , 不予對外開放 ….   唔緊要 , 我地轉去博覽會場後面既墨爾本博物館 Melbourne Museum 玩番夠本 . 呢度有勁多恐龍化石呀 , 密到似籠屋咁放埋一齊 XD 動物標本個廳勁多動物 , 多種類到無可能逐隻辨認 . 如果好似 Night of the Museum 咁一到夜晚班動物會番生 , 呢度一定好危險啦 , 咁多獅子 … 豹 … 場館有高科技設施 , 有個可以轉動既 panel , 唔知隻動物係乜名 , 可以轉動個 panel 對準隻野 , panel 就會顯示隻野既介紹 , 仲可以 download 落電話 !! 1992 年一條藍鯨被發現擱淺沙灘上 , 班澳洲人就等佢死左之後將佢煎皮折骨 , 副骨頭就成為博物館內最大的展覽 —18.7 米長的雄性藍鯨 . 睇完 Melbourne Museum 就會清楚澳洲係點樣一個地方 , 呢度的確係個大自然 , 博物館七成地方都係關於動物 , 海洋生物 , 昆蟲 , 森林 , 礦物   出發第四站 Docklands 食海鮮 ^^ , 坐免費電車 City Circle Tram 直達 , 沿途仲會介紹經過的景點 . 今日係 Waterfront City 好多間食肆都有 Super Tuesday , 我地去左食 ...