Day 084 – 7 天工作 - 完

2010年11月26日 墨爾本

連續工作了7日 , 平均每日10小時 , 頭3日做唔慣粗重野好攰 , 到第四日轉番對波鞋返工廠就好好多 , 身體和工作節奏都已適應

每朝返到廠都要係”飯堂”爭位食早餐 , 又迫又少時間 , 但都食到個公仔面既

今日好奇怪 , 鬼佬旅行團都興參觀工廠既咩? 今日無啦啦黎左班公公婆婆黎參觀 , 行左個圈影下相 , 10分鐘就走人 , 以為大陸團先有呢d景點tim

工廠有兩條生產線, 一邊全部都係柬埔寨人,有幾個印尼人, 一邊全部都係中國人。我地被安排係柬埔寨人果邊做野, 佢地全部都係講同一種語言, 不停咁嘰嘰咕咕。

詩: 我係生產線既最後位置, 我隔離有個中國女人”正蘭”, 佢係北方人, 所以有時都唔係太明佢講乜, 不過就好好人, 做到悶時可以同佢講幾句。而我對面線既都係柬埔寨人, 佢地有時同我都有講笑, 仲教我偷懶(都係有keep住做, 只係唔多露筍時, 唔使做咁快)。

個老闆真係食蕉架, 佢竟然話我成日同正蘭講野, 掉我入去接露筍。嘩, 我同正蘭都係一日講得兩三句ja, 咁都係成日, 咁佢d柬埔寨人一日到黑係咁講係咁講又算係冇講野ar, 完全係被種族歧視law。我同對面既柬埔寨阿姨掉轉左工作後, 大家都頂唔順, 完全唔習慣, 變得超慢。結果我地都唔理老闆, 掉番轉, 即刻快番好多, 仲會快到冇晒露筍綁, 老闆唔好攪咁多小動作la。果個柬埔寨阿姨好攪笑ga, 有次老闆背住企係我地隔離, 阿姨就用橡筋射佢, 因為大家都唔係太鍾意個老闆。

每天都連續工作9至11小時, 只有2個15分鐘小休, 同半個鐘食飯, 其餘都係企係到, 同以超快的動作綁露筍, 真係攰到扒地, 一放工就超快的煮晚飯同第二日帶返工的飯, 最早試過七點九就訓, 太陽都仲未落山。雖然大家都好辛苦地工作, 但都係為左之後有得去玩, 點都會堅持落去。

今日個天又落雨, 一個似曾相識的天氣, 我地又俾人炒左喇, 點解會同上次一樣架, 即時死亡。坐車返到屋企, 司機就同我地講聽日唔會黎載我地, 話老闆唔要我地。咁我當然問死因啦, 佢就話我做得慢同卓幫唔到手, 但自問我唔係慢lor, 同其他人一樣超快, 就算果日老闆企係隔離一齊做, 都係同一樣的速度, 超, 不如話我太快做晒d野冇野做, 仲有d超慢既人又唔炒, 真係@%$&*&^。

不過我地覺得件事唔係咁簡單啦,
其實都係日前果個電話講起。依份工係我地搵屋時, 有個屋主玉姐打黎問我地搬唔搬過去住, 仲有份工可以介紹。之後就每日不停地打黎, 話唔黎住都可以介紹, 露筍廠一個星期都有一千蚊, 只係收番一次的介紹費一百蚊, 咁我地都覺得ok la, 都係俾一次。咁我地就答應左出糧先俾佢, 佢當時都覺得冇問題ga。點知早一日就打黎話點解未俾佢, 好似爭佢十幾廿萬咁追數。痴線ga, 糧都未出俾乜佢呀。

講開糧, 仲激氣。網友Edith問左正蘭先知柬埔寨人係收18蚊個鐘, 而我地係$11.5, 俾人呃左$6.5一個鐘, 一日都呃左70蚊呀, 邊有一千蚊, 仲想我地俾一百蚊, 好唔想俾。因為我地唔搬過去住同未俾錢, 佢就做左d小動作, 就叫老闆炒左我地。我仲諗炒左我地, 佢又點收到錢丫。其實件事仲未完架。個玉姐再打黎話露筍廠果個位要俾其他人, 話有士多啤梨工介紹, 又係要收一人一百介紹費, 同時露筍廠做左一個星期都要俾左先, 咁佢咪又想呃多我地2百。根本就係一個局, 介紹費唔係得一次, 佢根本可以隨時令你失業, 又呃多筆介紹費, 如果真係應承做士多啤梨, 就已經呃左頭一次介紹費, 再唔知幾時再令你失業。即使冇錢都唔想咁樣俾佢呃, 咁樣俾佢牽著鼻子走。