浪跡天涯 漫步袋鼠國 我們的澳洲日誌

2010年10月31日 黃金海岸 Arundel 天晴 以前每作一個決定前, 都會跟自己講, 決定了就唔可以後悔。到了澳洲後, 經常都為左生活而煩惱, 經常都要作很多果斷的決定。從農場回到市區, 再次面對失業找工作的問題, 遇到很多的拒絕, 夢想都被現實推倒。決定了在酒樓工作一段日子, 決定了找離工作地方近一點的住所, 然後決定離開黃金海岸往墨爾本摘蘋果。真的不知道今次的決定是否正確, 因為要失去一點租屋時的定金、個人的誠信、生活的安定, 但換來的是遊覽新的地點、做香港做不到的農夫工作、享受大自然, 這不是working holiday 的意義, 就是要經歷多一點的困難, 要去冒險。幸好, 我不是一個人來到這裡, 他陪著我去面對, 支撐著軟弱的我, 我會慢慢變得堅強的, 多謝你 kelvin。

2010年10月30日 澳洲黃金海岸 為左慳錢 , 無工開果日或者無工開的下午都是捱肚餓 , 食幾塊餅充飢就算 返酒樓開工前有餐食 , 如果做到收鋪又有宵夜食 , 尋晚宵夜食左半隻乳鴿 :) 今晚酒樓返夜 , 有蝦醬通菜呀!! 食左兩大碗飯! 黎到澳洲食得最多種類既菜就係呢幾日了 頂 , 今晚10點半就收工 , 食唔到宵夜 , 又肚餓了

2010年10月 23-28 日 澳洲黃金海岸 從農場返回市區已經6天了 , 暫時先住左朋友的舅父家 , 租金當然要交啦 去左Harbour Town 找工作 , 有間中國 麵店請人 , 我地見過老闆 , 老闆娘再講述工作流程 , 但還是沒有接到通知上班...聽聞老闆唔好人 , 忘記這間吧 返回Southport , 我地之前住過的地區 , 去了酒樓搵工 , 第二日上班 , 試工期間人工得$8 每小時.... 詩詩日頭推車仔做點心妹 , 我夜晚先返樓面 ... 夜晚是做遊客的團餐 , 忙到唔停 .... 工時少, 時薪低 ... 希望快d搵到其他工啦

2010年10月20-22日 Aratula 陽光普照 在澳洲政府農工網找到剪洋?的工作 , 急徵40壯丁. 經過農工部幫助 , 我地拎左農場主人個電話, 得知人工係按工作計 , $40 一 Bin... 究竟一bin 有幾大呢 , 請繼續收看下文 我地趕急收搭行李 , 趕車入到去Aratula , 一個距離Gold Coast 有144km 遠的地方開始勞改生活 第一天 , 去到Aratula 大約下午一點 , 在一間Motel 前集合 , 這一天也有像我們一樣的新人來工作, 由於落雨 , 新來的沒有開始工作 , 但Motel 的房子已經住滿人 , 我們地被安排到另一個地方住宿....呢個地方夠厲害了 , 是個郊外露營場地 , 森林中的一片草地 , 班鬼佬去左搭帳幕 , 我地同另外1個台灣人 , 1對韓國人 , 1個尼泊爾人揀住係間"睡房" , 廁所是另一個Building , 廚房也在另一個buiding , 去個廁所和廚房要經過草地 , 落雨就麻煩了... "睡房" 和廁所都是沒有電的, 無燈 , 出入靠電筒 , 最糟糕係工頭竟然每人收$15 一晚, 2個人一星期要$210 , 在市區住得好好了, 學台灣人說 , 鬼叫呢度係農場 , 無得揀....工頭說第二朝5點鐘有巴士黎車我地去開工 . 第一晚, 詩詩無覺好訓 第二天 , 個個5點鐘起晒身stand by 好 , 點知工頭話架巴士9點半先黎 .... 終於等到開工, 終於見到個Bin 有幾大, 計過1Bin 大約有900 個洋葱. 我們的工作是將洋?連根拔起 , 剪去下面的根 和 上面的莖, 工作到大約收山6點 , 2個人才有2.5 Bin 收成....做到人都散 . 那對韓個農民比我們厲害 , 他們有4 Bin!! 淨係個男仔都有3 Bin , 當過兵果然勁d 左下角黃色的就是1 Bin 昆士蘭的天空 , 可以看見一層層很遠很遠的雲 :) 第三天 , 5點起身, 俾我地見到好可愛的袋鼠 , 2隻小袋鼠未天光就跳下跳下 , 想行埋d睇清楚 , 但佢地好機警即刻跳走左...  5點半 stand by , 但農地比較濕 , 要等到6點半才有巴士黎車我地去開工 . 今日太陽很猛 , 手腳都慢晒落黎 , 連韓國農民都要避埋遮陰 , 工頭話遲d仲熱呀, 成40度架....

2010年10月19日  好好天 明天出發Aratula 去挖洋葱!! 平時食洋葱就食得多 , 第時食可能會聞到我地既汗水味 XD Aratula 處於內陸 , 由Gold Coast 出發要坐車2小時 , 據聞人口得348人 今晚去左Surfer Paradise 間Clock Hotel 鋸扒 己經想食好耐 , 暫將會暫別Gold Coast 就去食啦~ $14 連杯啤酒  , 澳洲安格斯牛扒 , 好好味呀 這個Hard Rock Cafe 的大結他算是地標了 今個星期五六日Gold Coast 有一年一度的賽車盛事 , 緣慳一面了

2010年10月17日 Coolangatta and Byron Bay  好天到爆燈 這天天氣很好, 我地搵埋楊總充當導遊兼司機 ,  帶我地去 Coolangatta 和 Byron Bay 由Gold Coast  出發大約半小時車到達第一站 Coolangatta , 沿途經過見到很多漂亮的沙灘 , 黃金海岸也是以此為聞名 Coolangatta 是NSW 新南威以斯省 和 QLD 昆士蘭省之間的分界點 , 這坐大標柱就是這樣的地標 下一個景點係Byron Bay , Byron Bay 之所以出名 , 皆因呢度係澳洲最東的一隻角 小鎮須小 , 但滿街都是遊客和酒吧 , 還有不少人來衝浪的 , 沿著大街都可見到青年旅館和汽車酒店, 非常熱鬧 今天星期日搵個車位都難 而我地黎既目的當然唔單只係飲啤酒啦 , 我地目標係上燈塔~~~ Byron Bay Light House  1912年建成 白色塔身再襯埋藍天 , 好靚呀 可以沿著燈塔旁的小徑 走到近岸的岩水 , 近距離感受澎湃的太平洋海浪 日落下的巨塔...仲靚 邊吃自家製的香蕉蛋糕 , 邊看日落 今天的旅程完滿結束 多謝收看

2010年10月16日 星期六 黃金海岸 暴雨後的晴天 今天一醒來, 腦子一遍空白, 想不到有什麼可以做。 說了很多次, 想到屋後探索一下, 今天是機會了。 卓為我做了炒旦多士, 簡單的, 但卻很好吃, 為一天的開始注進能量。 吃過早餐, 一踏出門口, 已被大大的藍天吸引了, 只有幾朵白雲在飄著。   屋後的都是住宅, 多是獨立屋。 有幾棵紫色花的大樹, 地上舖著紫色的落花, 使我回想起在大阪的櫻花, 一樣的美。 路邊還有大約手掌大的野菇。 這間屋很有歐陸風味。 黃金海岸的南港是老人區, 依間係當地的老人院, 是渡假的嗎? 原來附近有大公園的, 是southport park。中間的是欖球場。 因為昨晚下大雨, 草地有很多水坑, 要小心點行。 公園旁有河流, 可以直出太平洋的。 在河流旁的獨立屋, 大多有船停泊著。 在露台看日落, 雖看不到太陽落下, 但天空的顏色是一層層的, 很分明 明天去野餐吧。 今天準備了用香蕉做的香蕉蛋糕, 不是用香蕉油的。 繼上次用現成的材料, 今次進階版, 用原材料。大挑戰噢! 香蕉蛋糕 (Bananna Bread) 材料: 1+3/4杯 篩好的麵粉 1湯匙 發酵粉 1/2茶匙 鹽 1/3杯 牛油 2/3杯 糖 2隻 蛋 3至4隻 香蕉  做法: (1) 預熱焗爐至175度 (2) 把麵粉, 發酵粉, 鹽 放入碗中 (3) 在另一個碗中, 把牛油壓至軟身 (4) 加入糖, 蛋至(3), 打均, 大約一分鐘 (5) 加入已壓成蓉的香蕉至(4), 並攪均 (6) 把(5)慢慢倒入(2), 一邊倒, 一邊攪均 (7) 把(6)倒入麵包盤, 再放入焗爐 60分鐘 (8) 測試: 用牙簽插入蛋糕, 拔出時牙簽乾淨的話, 就已經成功

2010年10月15日 黃金海岸 南港 拉尼娜現象 又下雨 失業後, 晚餐一切從簡, 無得大魚大肉了。 係woolworth 到發現最抵既蔬菜, 唔係生菜, 都唔係西蘭花, 係椰菜呀。椰菜半個係aud$1.8, 半個椰菜既份量有大有細, 我地當然點都揀個最大啦。半個椰菜兩個人食, 都可以煮到4餐。仲有豬肉碎都係抵食, 一盒豬肉碎 aud$4.6, 都可以分到5餐。 雖然成個星期既食材都係一樣, 但我已經整左幾個唔同既餸, 廚藝開始有少少進步了。 椰菜肉碎炒粒粒 材料 (2人份): 椰菜 1/8個 肉碎 細半碗 雜菜粒 少許 茨: 蠔油 1湯匙 鹽 1茶匙 糖 1茶匙 生粉 1茶匙 (1) 肉碎用鹽、豉油、油、胡椒撈好 (2) 炒香肉碎備用 (3) 炒椰菜、豆豆粒至軟身 (4) 加入肉碎炒香 (5) 倒入茨汁炒熱即成 椰菜炸菜肉碎炒丁 材料 (2人份): 椰菜 1/8個 肉碎 細半碗 粟米粒 少許 炸菜 細半個 公仔麵 3個 茨: 蠔油 1湯匙 鹽 1茶匙 糖 1茶匙 生粉 1茶匙 (1) 煮淋公仔麵, 過冷河備用 (2) 肉碎用鹽、豉油、油、胡椒撈好 (3) 炒香肉碎備用 (4) 炒椰菜、粟米、炸菜絲粒至軟身 (5) 加入肉碎炒香 (6) 倒入茨汁炒熱備用 (7) 燒熱穫加油, 倒入公仔麵炒乾 (8) 倒入(6) 炒香 羅宋湯 材料: 紅蘿蔔 2條 洋蔥 1個 椰菜 1/8個 肉碎 細半碗 茄膏 3湯匙 (本來都會用茄膏, 但發左霉, 要用意粉醬整) (1) 5碗水, 加入紅蘿蔔片、洋蔥絲、椰菜煲15分鐘 (2) 加入肉碎 再煲8分鐘 (3) 加入茄膏同黑胡椒煲滾即成

2010 年 10月15 日 黃金海岸 陰天 為了得到更多工作機會 , 我們買了車 !! 失業但有車 ...... 上星期開始上網找二手車, www.carsale.com.au 有最多的選擇 開始不停打電話給各位準賣家 , 電話通話費急升.... 試了一架Toyota, 楊總幫我試 , 但較為舊款 , 要渣一年有些困難 , 最終放棄 有去車行看看 , 車行經紀熱誠招待我們 , 車是多 , 但沒有岩心水 再約了一個賣家看車 , 看到他們的樣子 , 不像是好人 , 再次放棄 第三個賣家 , 他是己退休的伯伯 , 幫女兒買車 , 他很好人 , 很仔細講解架車每一部份的性能 , 韓仔幫我地試過架車都覺得沒有問題 , 於是我們便買了這架 , 款了按金 , 過兩日去運輸署 Queensland Transport Department 做車牌轉交手續 上vcheck 檢過架車 , 不是失竊車輛 , 沒有問題 澳洲咁大唔識路點樣渣 , 我地又去左買GPS (全球衛星系統), 幫車車買了保險 , 祝我們平安大吉 , 出入平安 今天伯伯準備了所須文件 , 交了錢 , 再由我渣去運輸署 , 第一次在澳洲渣車 , 第一次掛P牌 , 好在伯伯從旁指導 , 教我一些在澳洲渣車要知道的東西. 在運輸署完成所有手續 , 架車正式是我的了 伯伯車回家 , 伯伯回家後 我兩個就要靠自己渣回家了 , 好在有 gps 指路... 郊區少車較易渣 , 回家回市區就多車了 , 好在澳洲人都好忍讓 , 都無呠我 跟著沿路的車速限制 , 安全回到家

2010年10月14日 黃金海岸 陰天 努力上網搵工 send e-mail 中 我地要慳錢 , 早午兩餐都食面包 , 夜晚才煮飯食

2010年10月12日 黃金海岸  大致多雲 , 短暫時間有陽光 我地今日終於去得成sea world 喇, 等左咁多日, 今日先有番d陽光, 不過仲係有毛毛雨。 依到就係sea world 既門口, 有d似迪迪尼酒店既外型 我地點都要有番張合照先。由於自拍既技術未到家, 都係要靠好好既途人幫手。 一入正門, 就見到好大隻海盜船, 過多十五分鐘就開始表演。個show講述兩個唔同幫派既海盜去爭藏寶圖, 不過之後先知張藏寶圖係廢既, 寶藏一早沒有。海盜們一出場不停跳躍、打翻斗, 仲有單桿, 在表演體操嗎? 他們還有大飛同水上電單車, 一定係二十世紀的海盜。不過最厲害的就是有幾個海盜扒到桅杆頂, 再從4、5層樓的高度跳下, 只有少量水花。 睇完表演先過d, 第一次見到咁多隻塘鵝,好巨型, 佢地不停地"r"毛, 好忙咁 依到連芝麻街都變埋哈囉喂版, 佢地都由細陪我大架 我地去探訪北極熊, 不過隻野太懶, 係到訓覺, 淨係見到佢個背脊 !! sea world 的海豚相比起海洋公園的幸福很多, 每3隻可以有一個50米的標準池游水, 但當然冇野幸福得有自由的海豚, 在大海裡四圍游。我地只有一個欄杆的距離去睇海豚, 佢地真係好可愛。佢地仲有個波係到玩, 特登將波拋去人們, 要人陪佢玩 依個就係我地既午餐, 有海鮮籃+啤酒, 有蝦、魚柳、魷魚同薯條, 兩個人食已經夠飽了 應該細個係海洋公園掂過海星, 不過果時太細個了, 冇印象, 只有在相見到。原來海星唔係軟淋淋架, 係好似貝殼咁 仲有水族館, 上次去大板海遊館都大叫好靚, sea world 依個d水更加清, 好清楚見到每條魚, 仲有軟珊瑚。 我地坐係草地上睇海豚表演, d海豚很有默契, 動作一致, 還可以在高空做出幾個翻騰的動作才下水 依個就係sea world 的 monorail (單軌列車), 我地都坐左十多分鐘先兜左一個圈, 可以睇晒成個樂園既環境 我地一踏出sea world 就下雨了, 一直下到我地行到巴士站, 突然出現了雨後陽光, 很美呢

2010年10月10日 黃金海岸 雨雨雨 幫豪哥又起個花名 , 就叫楊總啦 今日去左楊總間屋玩 ... 嘩!! 間屋勁大勁誇張 , 詩詩可以係度跑黎跑去差點迷了路 間屋又大又靚 , $140租間房抵租啦 , 唔怪得楊總租左咁耐都無搬啦 ! 淨係個廚房己經好誇張 ! 呢間屋屋主放盤63萬 (AUD) , 個價錢係香港買美孚新村 , 過黎澳洲買幾千呎豪宅啦 屋主好好人整左大碗爆谷俾我地吃 :) 我地係電影房入面打wii , 打Boxing 真的很累人

2010年10月8日 黃金海岸 雨 最近數天都在下雨....是告訴我們有什麼事將會發生嗎 原本的計劃都要落空了 , 就是老闆娘的一句說話就令我們一起失業了 沒有任何通知 , 就只說 , 下星期老闆個仔放完假返黎做 , 下星期我們唔駛再返黎!! OH My GOD! 香港都未試過比人炒 , 炒老闆就試過 , 太可惡了 , 老闆娘趁老闆去左菲律賓工幹 , 謀朝篡位作反呀 !! 要收拾心情努力搵工

2010年10月7日 黃金海岸 晴 對自己好一點 , working holiday 也可以食好一點 , 今晚整左個一哥厚切焗豬扒飯!! by 卓 5人份量: (因為答應豪哥帶埋佢聽日下午果餐) -woolworth 豬扒2件 -蕃茄2個 切塊 -茄膏1/2瓶 -洋葱1個 切粒 -西蘭花1個 -雜豆 -旦1隻 早一晚搥鬆和醃定左豬扒放一雪櫃 今晚將旦漿茶勻豬扒 , 拍上生粉後煎到金黃色 西蘭花和雜豆煲至軟身 茄醬: 洋葱蒜蓉爆香穫 , 放入蕃茄和茄膏 , 加水煮 炒飯 , 加1隻雞旦炒 , 飯粒更有口感 焗爐預熱200度 炒飯放入焗盤 , 加入芝士 , 茄醬鋪面 , 再放菜粒 , 豬扒 焗15分鐘 即刻有得食 西蘭花伴碟 , 一哥厚切焗豬扒飯完成 !! 唔駛等下年返黎食大家樂 :) 焗15分鐘太耐咩? 點解咁燶!! 又切又煎又炒又煮又焗 , 製作費時 , 短時間內都不會再整..... 尋晚食魚 , 黎澳洲一個月第一次買魚食 無計 , 魚比較貴 , 2大塊2柳 0.56kg 要 $6 煮個簡單的栗米魚柳 , 快靚正 煎多兩條魚手指 .... 砌左條魚出黎 :) 豐富的早餐: 炒旦 , 果醬提子包 + 鮮奶 還差塊薯餅 , 漢堡扒就係麥記早晨全餐了!! 下年離開Gold Coast 環境轉變 , 可能無咁多好野食了