浪跡天涯 漫步袋鼠國 我們的澳洲日誌

2010年9月30日 黃金海岸 今晚間屋好熱鬧呀 日本仔Nori 過兩日就搬走了 , 今晚我地幫佢搞餐歡送晚會 , Nori 同 Nate 都叫左朋友上黎 , 所以今晚係好熱鬧 , 好開心 中式有香港代表: 西芹雞柳 , 用埋蠔油汁夠晒好味 日式係足料粆飯 , 仲有面鼓湯 韓國代表係炒豬肉配豆瓣酱, 原來日語豆瓣酱 係差唔多讀音架 今晚學左幾句韓文 , 長果d唔記得了 , 短既都記得既 , "Bali Bali" 係快d 咁解 Nori 搬走左, 屋主又仲未返 , 暫時間屋會得番3個人住...又要靜蠅蠅了

2010年9月29日 Gold Coast 黃金海岸 晴 放工無所事事 , 鋪頭又早關門 , 屋企又靜蠅蠅 , 我地連埋豪哥三個新界人竟然走左去行公園 , 個公園係附近 , 剛剛建成 , 有很大的太陽能系統 , 到了夜晚這裏比很多地方都光猛 , 公園邊有沙灘 , 仲要有防鯊網 , 除時都可以游水 , 最型係佢個浮台 , 如來佢係人型黎架!! 日本仔同屋主今個星期要搬走了 , 佢走埋間屋會仲靜 tim... 今晚煮左唔辣既星州炒米  ,  食完唔會出汗  :p

2010年9月28日 黃金海岸 早上時間有陽光 , 及後時間有大雨 今日想講下點樣搭巴士 南昆士蘭全個陸路交通網絡都已連上 www.translink.com.au 想知到由A地到B地要坐咩車 , 轉咩車 , 幾點有車 , 車程幾耐 , 車費幾多, 上一上網就一清二楚. 非繁忙時段搭車會平一些 , 岩晒我地 , 因為星期六日係非繁忙時段呀!! 週未去玩都可以慳返幾蚊. 點樣買飛? 可以上到巴士買司機買 , 佢會印張單俾你 , 如果要轉車show 一show 張單就可以扣番錢 , 因為這裏是計坐左幾多個區域黎定車費 另外 , 用Go Card 又比買車票平 , 所以搭車一定會用Go Card, 就好似八達通咁 , 方便好多 , 張咭可以係Seven 或者上巴士買 , 增值也一樣

2010年9月27日 黃金海岸 晴 , 藍天 今個星期到詩詩煮野食 , 又可以食好餸了 ^^ 放工我自己去了海邊跑步, 沿著海邊的跑步徑 , 背對夕陽一直跑 , 黃金海的景色很迷人 , 又有海風吹 , 唔覺唔覺就跑到上次食Seafood Basket 的Harley Park , 折返回家已經天黑了 , 條路都唔係好睇得清楚 , 幸好都有其他跑手 , 未至於太靜 , 跑步徑上每50米就有記號 , 今天紀錄是9公里!!  時間大約一小時啦 ! 回到家詩詩仲煮緊 , 幸苦晒~ 詩詩出品必屬佳品 , 今晚有 餐湯: 南瓜忌廉湯!!! 用左1/4個南瓜煲出黎 , 絶無添加!! 主菜: 薯蓉配心形雜豆粒加香煎雞扒!!!  

2010年9月26日 黃金海岸Movie World 晴 話明Working Holiday 當然要Holiday 下啦 今日我地去左其中一個主題公園 "Movie World" , 早一 日係間旅遊中心買左VIP 套餐 ,  $99.99 可以一年內無限次任玩三個主題公園 MovieWorld, Sea World 和 Wet&Wild. 所以我地呢4個月內會不停玩 , 玩到最抵 , 玩到佢厭 , 哈哈.... 趁夏天未黎去玩左Movie World 先 , 夏天再玩Wet & Wild , 簡直係完美的組合 機動遊戲方面有2個主打 , 第一個係超人過山車 Escape , 速動勁快 , 一啟動就全速彈出 , 最有趣係真係有個超人係車尾推住架車!! 第二個主打係蝙蝠俠Spaceshot , 就好像蝙蝠俠飛上天一樣 , 高高在上仲可以睇下風景。同跳樓機唔同既地方, 就係一秒就彈左上去, 再感受free fall跌番落去, 上落左幾次 值得睇既仲有荷李活動作特技表演環節 , 一幕幕驚險既飛車環節令人嘆為觀止 1) 係兩架泊左係到既車中間(距離一架車身位), 高速駛入, 打橫泊係到,就好似 | _ | 2) 架私家車可以用一邊既車軚行駛 3) 有個扮賊向警車開槍, 警車斷左兩截, 前面果截仲可以行駛 小鎮大街每隔一段時間就會有街頭會演 , 我地睇左蝙蝠俠 以第一集為藍本, 蝙蝠俠唔係好打得ja wo, 借位太明顯喇 不過都係小朋友心中的super hero 主題公園必秘的花車巡遊又點可以錯過呢 , 搵個靚位影餐飽先 惟一可以近距離影到的卡通人物 係因為遇到有團香港黎既旅客, 包左佢地, 我地就搏大霧影埋一份 (咁岩我又係白兔衫喎) 明天返工努力搵銀

2010年09月25日 星期六 黃金海岸--Labrador  陰天 星期六大多數既舖頭都好早收工, 我地就朝早七點半就起身, 準備去拉布拉多(Labrador)既魚市場食早餐, 係食海鮮早餐呀, 哈哈。 點知早左去到, 魚市場開左門, 但未開始煮野食呀, 要等到九點先有得賣, 仲要等多半個鐘先有得食呀, 已經好肚餓, 咕~~~~ 入面乜海鮮都有, 好多都係黎自澳洲最南部既Tasmania, 煮好既都有。 等既期間我地四圍行下先。因為魚市場係海邊, 有好多海鷗同塘鵝。班海鷗好似乞衣呀, 周圍行, 一見到有人拎住野食, 就會成群湧埋黎等食, 係企係到圍住等。 仲有兩隻身型巨大既塘鵝 , 好型咁企係條燈柱上 , 型到爆燈 等緊開門去公園玩陣時 , 重拾童年回憶 (點解大埔無既? 沙田曾經有喎) "開餐嘞 , 等到腳軟!!" 海鷗說... "炸魚! 炸蝦! 炸魷魚圈! 炸蟹棒! 炸薯條 !" 我們流著口水說... 開頭食果陣時 得幾隻海鷗乖乖咁企係度等食 , 詩詩好八厭咁拋d炸粉俾班乞衣食 餵餵下引左一大班海鷗埋黎....佢地開始係度呱呱叫爭飯食 ..十幾隻圍實左我地張枱 .好得人驚呀 !! 成班流民咁 為勢所迫 , 我地搬枱走人!! 食飽飽去下一站進發---Harbour Town 呢度就好似東涌東薈城咁 , 好多特賣場 , 呢度當然大好多啦 , 賣衫都好平呀 , 早知香港唔駛帶咁多過黎啦!! 買生果都好平呀 , 即刻買盒士多啤棃仔黎食 , 如果人多可以一次過$5 買到8盒 , 抵到爛呀 海鮮之旅第三站又係食嘞!! 上網見到呢間 Harbour Seafood Market 好好咁喎 , 我地叫左半打生蠔 , 半打大蝦 勁新鮮 , 蠔完全唔會苦 , 好食過上次間酒店多多聲 , 蝦有手掌咁大隻 , 又多膏 , 好想食多幾打呀 呢間海鮮有好多選擇 , 價錢都幾吸引 附送食物玩照 多謝收看 。

2010年9月24日 黃金海岸 星期五 晴 卓: 習慣左返工的時間 , 現在可以越黎越遲起身 , 都唔會怕遲到 . 詩: 但而家一齊返工, 我又繼續香港既習慣, 叫極都唔醒, 哈哈哈, 激死人lu... 每天都會由 Lather St 行去 Southport Central, 車都唔使搭, 行得快既可以5分鐘行到。 不過早上的天氣實在太好, 可以抬頭望下個有白雲既藍天, 路上樹上都有好多雀仔。今日見到兩隻黃色嘴的細雀追住啄隻烏鴉 , 哈哈 , 完全感受到外國與大自然親近的生活 卓: 澳洲d路闊到 , 一架架車泊晒係路中間 Southport 無乜高樓大廈 , 10隻手指都無呀 , 我地返工果度樓下係office  , 樓上係住宅 , 租金大約$480 一星期。如果租到樓上既sharehouse既話, 我地可以成日連街都唔經過, 好宅ar XD 公司老闆係個英國超級肥佬 , 又高又肥不過個人幾Nice. 佢地成家都係度返工 , 日日一家大細老婆仔女連孫仔孫女都係齊度 . 詩: 今日係我返工第二日, 個老闆行過都問我做成點, "Are you happy?" & "How is going on today?", 我當然"讚好"(Like)啦!! 卓: 再次感謝豪哥帶左我地兩個入黎 老闆兩個細仔今日做左搬運工人 , 幫我地填番滿個雪櫃 , 太好了 , 肥可樂任飲 帶個檸檬返工先 卓: 每逢星期五都係最開心既日子 , 因為今日出糧嘞 ! 詩: 我係度返兩日工已經超越包店一星期的人工了!! 放工去超級市場行個圈先 woolworths 的貨品比coles 新鮮 , 又大間d , 我地多數會去woolworths 超市很大 , 比香港百佳超級廣場還要大一倍 , 貨架上的貨品多到記唔晒 , 最誇張係早餐粟米片 , 多到佔左一行. 上圖左下角係鮮奶櫃 , 支支都有2公升 , 全脂奶正呀 上圖右下角係一支支香料 , 好似一支支模型油咁~ 哈哈 下午去左食日本野Ebi Don (吉烈蝦飯$9.5)和Chicken katsu Don (吉烈雞扒飯$9.5) , 由於飽到上心口 , 夜晚都未餓 , 今晚只整左份 粟米紅蘿蔔奄烈 加薯餅 , 早餐當晚餐 , 哈哈 節目預告: 聽日去海邊食生鮮魚~Fish...

2010年9月23日 黃金海岸 晴天陰天雨天都在同一天 晨早落街去返工 , 藍藍的天空 , 吸一口新鮮的空氣 , 立即充滿朝氣 詩詩今日同我一齊返SurfPacific , 這是間網絡行銷公司 , 黎到澳洲竟然可以一齊返office job!! 屋企行10分鐘就到辦工室 , 認真方便 , 車錢都慳唔少 大家都好歡迎詩詩的加入 , 特別係老闆 , 佢今日竟然講Good 多過 講Fxxk. 4點半放工 , 係澳洲無咩野做 都係煮野食 , 我地輪流煮野食 , 今個星期都係我煮 , 我話事 , 所以整餐粟米牛油炒煙肉 , 肥業都煮既果然夠好味

2010年9月22日 黃金海岸 陰天天氣涼 詩詩今日曠工!! 因為聽日有新工返了 ~ 就係同我一齊去英國佬公司寫web page ~ 今鋪真係日見夜見.... 這個模特兒是誰呢? 咁大條牙罅都有人搵佢影相? 係旅遊書仔又見到skydiving 廣告嘞 , 唔知幾時會玩呢? 未黎澳洲前只聽講人用草地滾球 , 乜原來水上都可以人肉滾球 !? 六師弟輕勁水上漂終於揚威四海了 .... 如果個波穿左咪直沉海底? 都幾得人驚 之前煮餐餸都無蓋 , 今日突然間發現可以用另一隻穫可以當蓋用 , 炒餸上黎都方便好多了 . 這邊買冰皮月餅要成港紙三百幾蚊一盒 , 咁貴唔食啦 , 煮湯丸仲好, 人月兩團圓 原來韓國今日都有中秋節咁 , 佢地會整米糕過節 ... 點咁係米糕? 唔知呀 , 韓仔同屋主話佢地會整Rice Cake lol 今日終於收到ABN 信嘞  , 因為公司當我係外判 , 所以要開番個ABN交稅 等左成兩個禮拜終於收到 . TFN 一個禮拜就有啦 , ABN 都唔知搞乜架

2010年09月20日 黃金海岸 雨 今日終於等到出糧, 面包店一個星期返左5日, 得24個鐘, 份糧aud$200都唔到。 雖然每日返既時間唔長, 但係要不停手不停地抹抹抹, 換來的只有少少的人工和多多的瘀傷。 依個係今個星期的時間表, 返4日ja, 但星期5係要由9:30 返到收舖, 9個鐘呀, 仲要得半個鐘休息。除左老闆Lisa返8:00~收舖外, 最長就係我呀!! @@ 我而家真係心都灰埋, 日日返工都hea住做, 有d無理取鬧既人鬧我, 我就兇返佢, 奇怪的佢又對我客氣番。因為我已經豁出去, 炒咪炒, 香港都未試過俾人炒。 晚上, 今個星期煮飯既工作交左俾卓卓。哈哈, 佢整左最穩陣的粟米肉粒飯同生菜, 真係好好食, 本來想留番多一份第二日食, 都已經清埋, 真係好好食。

2010年9月19日 黃金海岸  天陰陰 朝朝準時6點就俾可惡既烏雅 (正字:鴉) 嘈醒...擾人清夢 要打電話回香港可以用 skype, 月費港紙$48 任打 , 經internet 打所以咁平 , 我地都用緊啦 今日行左半粒鐘去到間屋仔檢視環境 , 佢間主人房係勁大, 面積有我地依家個廳咁大 , ,又有套廁 , 衣帽間 , 不過間屋住左4個人 , 我地成日煮野咪有排等? 地點又不太好 , 都係諗諗再睇睇先算 黎到澳洲發現 , 部份澳洲人是不穿鞋的 , 無論係商場內或是石屎路上 , 都是光著雙腳周街走 . (睇過有本書講佢地點解唔著鞋, 係因為佢地覺得夜晚都要沖涼, 赤腳先又有乜所謂) 澳洲鬼仔都係癲的 , 夜晚渣架車出黎見人就擲雞蛋 , 夜晚唔好行咁街路邊 , 隨時會中招 同屋主韓國仔好守紀律 , 一星期七天都9點睡覺, 半夜3點起身返工 , 最緊要係一星期七餐晚餐都係煙肉洋葱炒飯....當過兵兩年果然紀律嚴明 , 小弟甘拜下風 Edited by 卓 Revised by 詩

2010年9月17-18日 黃金海岸 陰 "今日沒有什麼特別" 香港茶餐廳內最喜歡叫的碟頭飯 : 生炒牛飯 黎到澳洲可以親手炒一碟嘞 !! 落穫炒已經好香 , 越炒越想食 完成! 雖然賣相有點似上海菜飯.... 詩詩放工拎的面包 , 腸仔包會用紅腸 , 聞所未聞 !! 這是我們的糧倉 , 價錢關係..大部份都係 "百佳" 牌 給媽媽看的 ,  我們住在這裏 的三樓 變種袋鼠呀 !! 袋鼠袋變左排腹肌 !! 下午四圍逛 , Sams Warehouse 和 K-mart 是我們的遊樂場 呢度救生衣都有得買 , 仲有Mr 薯片 , 食左會唱 "如果我陳奕迅  , 這句話太吸引" 澳洲國旗沙灘毛巾 , 下次去沙灘買條鋪地先 澳洲最多就係coffee shop, 我地之前試果兩間地道既coffee shop 都唔係太得, 試埋依間連鎖coffee shop先 我係俾佢個長頸鹿招牌吸引, 我地order左杯 latte 同 cappuccino, 睇個樣都幾靚, 但原來係超淡, 好似水咁, 聞唔到咖啡味架!!!