澳洲工作假期 Day 007 - 搵到工 & 脫離意粉日

2010年9月9日 澳洲黃金海岸 晴但有雲

by 詩
今日想抖抖, 係屋企裡上網找工作, 目標都係在酒店裡waitress的工作。在酒店網頁搵工期間, 見到請 Electronic Gaming Attendant, 即係係酒店下的賭場協助客人點用老虎機、廿一點等等既賭錢機, 作左封信, 寫自己有乜優點、點解做果d, 都係要等去in。 寫好又覺得眼訓, 又訓左陣。聽日本室友Nori講, australia fair 果間包店係香港人開既, 心諗人工一定唔會高啦, 但有得做, 好過冇野做係到呆丫, 拎個經驗都好丫。咁下午就去左間包店(Bread Top)問下工, 點知都係放低resume。

見冇野做, 就去 Coles 超級市場買定d晚餐。因為朝早終於同左中國藉既屋主佳佳msn (因為她回了祖國), 原來個飯煲係共用的, 我就決定今晚要食飯。係Coles 買左袋2kg 米 (aud$2.99), 價錢都幾抵, 再買左一盒11件既雞脾 (aud$6.5), 買多袋忌廉咖哩調味包, 薯仔、洋蔥各一隻, 就可以煮咖哩雞飯喇。

5點幾就開始切材料準備, 切切下, 收到電話, 係包店打黎既, 佢問我住係邊。 因為太近既關係, 佢問我可唔可以而家見佢, 咁我就飛跑出去。果個老闆應該係香港人, 仲有個老闆娘講國語的。 佢地見我之前做工程師, 就問我點解過黎做, 會唔會覺得好唔值。我過得黎澳洲就預左啦, 係香港唔會做既野, 我就要過黎試。佢要我星期六黎試工3~4個鐘, 希望都唔係太難啦, 我要學整餅、學沖咖啡, 過黎既目的已經達到, 只係唔係外國人開的。唔緊要架, 而家最緊要有經驗, 之後再搵都易d。

返到屋企繼續煮埋d咖哩雞先。返到屋企, 就見到卓卓已經煲左飯喇, 同埋開始煎埋d雞脾, 太叻仔喇。煎好就加埋d洋蔥、紅蘿蔔、薯仔、調味包一齊煮十分鐘。再整埋第二個餸, hehe, 係有兩個餸ga, 不過差個湯咁。就係蕃茄炒旦喇, 先將蕃茄微微炒乾, 再加埋打好既旦, 炒兩炒又有得食喇。

咖哩雞脾

材料:
薯仔 x 1
紅蘿蔔 x 2
雞脾 x 5
洋蔥 x 1
咖哩調味包 x 1

1)把薯仔,紅蘿蔔, 洋蔥切粒
2)雞脾用少少鹽調味, 半小時
3)先下油, 把雞脾煎至金黃色
4)加(1)炒一炒
5)加埋調味包再煮多十分鐘食得

蕃茄炒旦

材料:
蕃茄 x 2
旦 x 2
少少鹽

1) 先下油, 炒一炒蕃茄粒至乾身
2) 加入已打好及加鹽的旦, 炒至剛凝固就熄火
3) 用穫的餘溫再炒, 就可以有滑旦喇